බංග්ලාදේශයට යළි පැමිණීමට හසීනා නව ගමන් බලපත්‍රයක් ඉල්ලයි
2024දී රටින් පිටව ගිය දා සිට ස්වකැමැත්තෙන් ඉන්දියාවේ පිටුවහල් දිවියක් ගත කරන බංග්ලාදේශයේ හිටපු අගමැතිනි ෂෙයික් හසීනා (Sheikh Hasina), සිය රටට ආපසු පැමිණීම සඳහා නව ගමන් බලපත්‍රයක් සහ ජාතික හැඳුනුම්පතක් ඉල්ලා සඳුදා අයදුම් කළාය. ඇය පලා ගිය පසු ඇගේ කාර්යාලයෙන් සිදුකළ මෙවැනි පළමු නිල සම්බන්ධතාව මෙයයි.
නව ලේඛන කඩිනමින් නිකුත් කරන ලෙස ඉල්ලා ලන්ඩනයේ මැට්‍රික්ස් චේම්බර්ස් (Matrix Chambers) නීති ආයතනයේ නීතිඥවරු නවදිල්ලි නුවර බංග්ලාදේශ වැඩබලන මහ කොමසාරිස් ප්‍රීති රහ්මාන් (Preeti Rahman) වෙත ලිපියක් යැවූහ. අන්තර්වාර ආණ්ඩුව ඇගේ ගමන් බලපත්‍රය සහ හැඳුනුම්පත අවලංගු කිරීම බංග්ලාදේශ පුරවැසියකු ලෙස ඇයට ඇති අයිතිවාසිකම් සහ ජාත්‍යන්තර මානව හිමිකම් ලේඛන යටතේ රටට පැවරෙන බැඳීම් උල්ලංඝනය කිරීමක් බව ඔවුහු තර්ක කළහ. දෙසැම්බරයේ ආපසු පැමිණීමේ සැලැස්ම ක්‍රියාවට නැංවීමට ඇය අදහස් කරන බවට මෙතෙක් ලැබුණු පැහැදිලිම සංඥාව ලෙස මෙම ඉල්ලීම සැලකේ.
2024 ශිෂ්‍ය නායකත්වයෙන් පැවති ජන නැගිටීම ප්‍රචණ්ඩ ලෙස මර්දනය කිරීමට නියෝග කළ බවට එල්ල වූ චෝදනා සම්බන්ධයෙන් බංග්ලාදේශ යුද අපරාධ විනිශ්චය සභාව පසුගිය නොවැම්බරයේ හසීනා නොපැමිණි අවස්ථාවේ ඇයට මරණ දඬුවම නියම කළේය. පිටුවහල්ව සිටිමින් ඇය එම චෝදනා නැවත නැවතත් ප්‍රතික්ෂේප කර ඇත. ආපසු පැමිණ අධිකරණයට භාරවීමට අදහස් කරන බව ඇය මීට පෙර පවසා ඇති අතර, අවශ්‍ය විධිවිධාන අවසන් වූ පසු පැමිණෙන දිනය ප්‍රකාශයට පත් කරන බව ඇගේ සහායකයෝ සඳුදා පැවසූහ. "මරණය මගේ ඉරණම නම්, මගේම මිනිසුන් අතර, මගේම මව්බිමේ මියයන්නට මට අවශ්‍යයි," යැයි ඇය පවසා තිබේ.
වාර කිහිපයක් තුළ වසර 20කට වැඩි කාලයක් රට පාලනය කළ හසීනාගේ අවාමි ලීගය (Awami League) මේ වන විට තහනම් කර ඇති අතර, එහි බොහෝ නායකයෝ සිරගතව හෝ පිටුවහල්ව සිටිති. අගමැති තාරික් රහ්මාන්ගේ (Tarique Rahman) ආණ්ඩුව ඇය ඉන්දියාවෙන් උදර්පණය (extradition) කරගැනීමට තවදුරටත් උත්සාහ කරන නමුත් නවදිල්ලිය මෙතෙක් එය ප්‍රතික්ෂේප කර ඇත. ඇගේ පැමිණීම බංග්ලාදේශයේ බෙදීම් තවත් ගැඹුරු කළ හැකි අතරම ඩකා සහ නවදිල්ලිය අතර සබඳතාවල ස්වරූපයද වෙනස් කළ හැකි බව දේශපාලන නිරීක්ෂකයෝ පවසති.