2025 අයවැයේ ඉහළ වටිනාකම් යෝජනා 40%ක් ප්‍රමාණවත් ලෙස ක්‍රියාත්මක නැහැ
ශ්‍රී ලංකාවේ 2025 අයවැයේ ඉහළ වටිනාකමක් සහිත යෝජනා 36න් දහහතරක්, එනම් 40%ක් පමණ, ප්‍රමාණවත් ලෙස ක්‍රියාත්මක කර නොමැති බව වෙරිටේ රිසර්ච් (Verite Research) පර්යේෂණ ආයතනයේ නව අයවැය පොරොන්දු (Budget Promises) ඇගයීමකින් හෙළි වේ.
මේ අතර, සම්පූර්ණයෙන් ක්‍රියාත්මක කළ යෝජනාවල ප්‍රතිශතය 2024දී පැවති 17% සිට 2025දී 33% දක්වා ඉහළ ගොස් ඇති අතර, එය 2017දී අධීක්ෂණය ඇරඹූ පසු වාර්තා වූ ඉහළම අගයයි. සමස්තයක් ලෙස 41%ක් හෙවත් යෝජනා 15ක් සම්පූර්ණයෙන් හෝ බොහෝ දුරට ක්‍රියාත්මක කර තිබේ. අයවැය ඉදිරිපත් කෙරුණේ 2025 පෙබරවාරියේදී බැවින් සාමාන්‍යයට වඩා ක්‍රියාත්මක කිරීමේ කාලය අඩුව තිබියදීත් මෙම ප්‍රගතිය වාර්තා විය.
ප්‍රමාණවත් තොරතුරු නොමැතිකම හේතුවෙන් තවත් 19%ක් හෙවත් යෝජනා හතක් තොරතුරු අනාවරණය නොකළ ඒවා ලෙස වර්ග කර ඇත. රුපියල් මිලියන 500ක් හෝ ඊට වැඩි වටිනාකමක් ඇති යෝජනා 36ක් ඇගයීමට ලක් කළ අතර, ඒ සඳහා වෙන් කළ මුළු මුදල රුපියල් බිලියන 212කි.
විනිවිදභාවයේද සැලකිය යුතු ප්‍රගතියක් දැකගත හැකි විය. යෝජනාවලින් තුනෙන් දෙකකට ආසන්න ප්‍රමාණයකට, එනම් 64%කට, විවෘත ශ්‍රේණිගත කිරීමක් හිමි විය. 2017න් පසු පළමු වරට කිසිදු යෝජනාවක් සංවෘත ලෙස ශ්‍රේණිගත කර නොතිබිණි. එනම් ප්‍රගතිය ඇගයීමට තරම් තොරතුරු නොතිබූ අවස්ථාවලදී පවා සෑම යෝජනාවක් සම්බන්ධයෙන්ම අවම වශයෙන් යම් තොරතුරක් ලබාගත හැකි විය. අයවැය පොරොන්දු යනු 2017 සිට ශ්‍රී ලංකාවේ වාර්ෂික අයවැය කතාවල යෝජනා ක්‍රියාත්මක කිරීම අධීක්ෂණය කරන රාජ්‍ය මූල්‍ය අධීක්ෂණ වේදිකාවකි.