බැංකු කාඩ්පතින් බස් ගාස්තු ගෙවීම මාස හයක් තුළ ක්‍රියාත්මකයි
පොදු ප්‍රවාහනය භාවිත කරන මගීන්ට බැංකු කාඩ්පත්, එනම් ණය කාඩ්පත් (credit cards) සහ හර කාඩ්පත් (debit cards), මගින් බස් ගාස්තු ගෙවීමට ඉඩ සලසන ක්‍රමය ඉදිරි මාස හය ඇතුළත ක්‍රියාත්මක වන බව ශ්‍රී ලංකාවේ ජාතික ගමනාගමන කොමිෂන් සභාව (National Transport Commission) පැවසීය.
ගමන් අතරතුර ඉතිරි මුදල් ලෙස ලබාදීමට රුපියල් 2, 5 හෝ 10 වැනි සුළු මුදල් කොන්දොස්තරවරුන් සතුව නොමැති බවට මගීන්ගෙන් ලැබෙන පැමිණිලි සහ ඒ හේතුවෙන් ඇතිවන ආරවුල් වැළැක්වීමේ අරමුණ පදනම් කරගෙන මෙම පියවර ගන්නා බව කොමිෂන් සභාව සඳහන් කළේය.
නියමු ව්‍යාපෘතිය අවසන් කර ඇති බව ද එය පැවසීය.
බැංකු කාඩ්පත් හරහා බස් ගාස්තු ගෙවීමේ පහසුකම සැපයීමට පෞද්ගලික සහ රාජ්‍ය බැංකු හතක් එකඟ වී තිබීම විශේෂත්වයකි.