චාවකච්චේරියේදී අයිස් මත්ද්‍රව්‍ය සමග තරුණයන් තිදෙනෙක් අත්අඩංගුවට

යාපනයේ චාවකච්චේරිය ප්‍රදේශයේ සැකකටයුතු ලෙස හැසිරුණු තරුණයන් තිදෙනකු නවතා පරීක්ෂා කිරීමෙන් පසු, අයිස් ලෙස හැඳින්වෙන ක්‍රිස්ටල් මෙතැම්ෆෙටමීන් (crystal methamphetamine) මත්ද්‍රව්‍ය සමග ඔවුන් අත්අඩංගුවට ගැනීමට පොලිස් විශේෂ කාර්ය බළකා නිලධාරීහු කටයුතු කළහ.

එක් අයකු සන්තකයේ තිබී ග්‍රෑම් 13යි මිලිග්‍රෑම් 710ක්ද, අනෙක් දෙදෙනා සන්තකයේ තිබී පිළිවෙළින් ග්‍රෑම් 1යි මිලිග්‍රෑම් 300ක් සහ ග්‍රෑම් 1යි මිලිග්‍රෑම් 400ක්ද නිලධාරීන් සොයාගෙන තිබේ. ඒ අනුව මුළු ප්‍රමාණය ග්‍රෑම් 16යි මිලිග්‍රෑම් 410කි. වැඩිදුර නීතිමය කටයුතු සඳහා තරුණයන් තිදෙනා අත්අඩංගුවට ගත් මත්ද්‍රව්‍ය සමග චාවකච්චේරිය පොලිස් ස්ථානයට භාරදී තිබේ.