සති 31ක ගැබ් ගැනීම අවසන් කිරීමට චෙන්නායි මහාධිකරණයෙන් අවසර; රටපුරා විවාදයක්

සති 31ක ගැබ් ගැනීමක් අවසන් කිරීමට අවසර දෙමින් චෙන්නායි මහාධිකරණය (Chennai High Court) මෑතකදී ලබාදුන් තීන්දුවක් හේතුවෙන් කාන්තාවකගේ ප්‍රජනන ස්වාධීනත්වය (reproductive autonomy), කලලයේ තත්ත්වය, වෛද්‍ය මණ්ඩලවල කාර්යභාරය සහ ගබ්සාව සඳහා පවතින නීතිමය සීමා පිළිබඳ ජාතික මට්ටමේ විවාදය යළි මතුවී තිබේ.

පවිත්‍රා කුමාරි (Pavitra Kumari) නමැති කාන්තාවක් ගොනු කළ මෙම නඩුවට අදාළව, ගර්භණී සමයේ සාමාන්‍ය ස්කෑන් පරීක්ෂණවලදී කලලයේ මොළයේ වර්ධන අසාමාන්‍යතාවක් හඳුනාගෙන තිබිණි. පසුව කළ ස්නායු අල්ට්‍රාසවුන්ඩ් පරීක්ෂණ (neurosonography) සහ කලලයේ MRI පරීක්ෂණ මගින් මොළයේ අර්ධගෝල දෙක සම්බන්ධ කරන තන්තු පටිය නොවැඩීම (agenesis of the corpus callosum) සහ දෙපස මස්තිෂ්ක කෝෂිකා විශාල වීම (bilateral ventriculomegaly) තහවුරු කෙරිණි. මෙම තත්ත්ව සහිතව උපදින දරුවන්ට කථනය ප්‍රමාද වීම, ඉගෙනීමේ අපහසුතා සහ බුද්ධිමය ක්‍රියාකාරීත්වයේ දුර්වලතා ඇතුළු බලපෑම් ඇතිවිය හැකි බව වෛද්‍ය ඇගයීමේ සඳහන් විය.

ගැබ් ගැනීම තවදුරටත් පවත්වාගෙන යාමට අකමැති බව කාන්තාව සහ ඇගේ සැමියා තීරණය කළද, එම අසාමාන්‍යතා ජීවිතයට තර්ජනයක් නොවන බව පවසමින් ප්‍රාන්ත වෛද්‍ය මණ්ඩලය අවසර ලබාදීම ප්‍රතික්ෂේප කළේය. ඉන්පසු යුවළ අධිකරණයට ගිය අතර, ගැබ් ගැනීම අවසන් කිරීමට මහාධිකරණය අවසර දුන්නේය. මෙම තීන්දුව හේතුවෙන් ගබ්සා නීතියේ සඳහන් ගර්භණී සති සීමා පිළිබඳව යළි සාකච්ඡාවක් මතුවී තිබේ.