අඛණ්ඩ අධික වර්ෂාවෙන් හැටන් ප්‍රධාන බස් නැවතුම්පළ ජලයෙන් යට වේ; නායයෑමේ අනතුරු ඇඟවීමක්
කඳුකරය පුරා අධික වර්ෂාව අඛණ්ඩව පවතින බැවින් හැටන් ප්‍රධාන බස් නැවතුම්පළ අද (09.11.2026) ගංවතුරෙන් යට වූ අතර, සමහර ස්ථානවල නායයෑම් සිදු විය හැකි බවට අනතුරු ඇඟවීම් නිකුත් කර ඇත.
නගරයේ ප්‍රධාන මාර්ගයේ රැඳී ඇති වැසි ජලය ගමනාගමනයට දැඩි බලපෑමක් කර ඇති බව ප්‍රදේශයෙන් ලැබෙන වාර්තා පවසයි.
බස් නැවතුම්පළට ඉහළින් ඇති කාමිනිපුර ප්‍රදේශයෙන් ගලා එන විශාල ජල ප්‍රමාණයක් පරිශ්‍රය තුළ එක්රැස් වන බැවින්, එහි නායයෑමේ අවදානම ද ඉහළ ගොස් ඇති බව වාර්තා වේ.
මේ අතර, අඛණ්ඩව පවතින වර්ෂාව හේතුවෙන් හැටන් කලාප අධ්‍යාපන කාර්යාලයේ ගිණුම් අංශයට වැසි ජලය කාන්දු වන අතර, එහි නිලධාරීන් මහත් අපහසුතාවයට පත්ව සිටින බව වාර්තා වේ.
දීපාවලි උත්සවය සඳහා දුරස්ථ පළාත්වලින් හැටන් වෙත පැමිණි සමහර වෙළෙන්දන් ජලයෙන් යට වූ ප්‍රධාන මාර්ගයට කසල මළු විසි කරමින් ගමනාගමනයට තවදුරටත් බාධා කරන බවට ප්‍රදේශවාසීහු චෝදනා කර ඇත.
කඳුකරයේ වර්ෂාව අඛණ්ඩව පවතින බැවින්, ප්‍රදේශවාසීන් සහ සංචාරකයන් ප්‍රවේශමෙන් කටයුතු කරන ලෙස උපදෙස් දී ඇත.