මෝටර් රථ ප්‍රවාහන දෙපාර්තමේන්තුවේ එක්දින හා සාමාන්‍ය සේවා පුළුල් කෙරේ
මහජනතාවට වඩාත් පහසුවෙන් සේවා ලබා ගැනීමට හැකි වන පරිදි මෝටර් රථ ප්‍රවාහන දෙපාර්තමේන්තුව (Department of Motor Traffic) සිය එක්දින සහ සාමාන්‍ය සේවා පුළුල් කර ඇතැයි මෝටර් රථ ප්‍රවාහන කොමසාරිස් ජනරාල් තුෂාර ප්‍රනාන්දු (Thushara Fernando) මහතා පැවසීය.
නව වැඩපිළිවෙළ යටතේ එක්දින සේවාවක් ලබා ගැනීමට අපේක්ෂා කරන සෑම අයකුම කල්තියා වේලාවක් වෙන් කර ගත යුතුය. නව වාහන ලියාපදිංචි කිරීම, වාහන හිමිකම් පැවරීම, රියැදුරු බලපත්‍ර සේවා සහ තාක්ෂණික ගැටලු විසඳීම ඇතුළු සියලු එක්දින සේවා සඳහා මෙලෙස වේලාවක් වෙන් කර ගැනීම අවශ්‍ය වේ.
දෙපාර්තමේන්තුවේ නිල මාර්ගගත වෙන්කිරීම් පද්ධතිය (online booking system) වන dmtappointments.dmt.gov.lk ඔස්සේ වේලාවන් වෙන් කර ගත හැකිය.
නව යතුරුපැදි ලියාපදිංචි කිරීම දැන් දිස්ත්‍රික් කාර්යාල මගින් සිදු කෙරේ. මීට අමතරව, සාමාන්‍ය ක්‍රමය යටතේ වාහන හිමිකම් පැවරීමේ ලේඛන නාරාහේන්පිට ප්‍රධාන කාර්යාලයට පමණක් නොව දිස්ත්‍රික් ලේකම් කාර්යාල සහ ප්‍රාදේශීය ලේකම් කාර්යාල තුළ පිහිටි දිස්ත්‍රික් කාර්යාලවලට ද භාර දීමට මහජනතාවට හැකිය.
මෙම ව්‍යාප්තිය මගින් සේවා වෙත ප්‍රවේශය පහසු වන අතර මහජනතාවට ඒවා වඩාත් කාර්යක්ෂමව ලබා ගැනීමට හැකි වනු ඇත.
කල්තියා වේලාවක් වෙන් කර නොගෙන පැමිණෙන අයගේ එක්දින සේවා ඉල්ලීම් තවදුරටත් භාර නොගන්නා බැවින් නිල වෙන්කිරීම් පද්ධතිය පමණක් භාවිත කරන ලෙසත් අවශ්‍ය ලේඛන සමග නියමිත වේලාවට පැමිණෙන ලෙසත් මහජනතාවට දැනුම් දී තිබේ.
පෝලිම් අවම කිරීම සහ ප්‍රධාන කාර්යාලයේදී ජනතාවට ගත කිරීමට සිදු වන කාලය අඩු කිරීම මෙම වෙනස්කම්වල අරමුණ බව නිලධාරීහු පැවසූහ.