චීනයේ Shenzhou-24 මෙහෙයුමට පාකිස්තාන ගගනගාමියෙක්: මධ්‍යස්ථානයට යන පළමු විදේශිකයා
ඉදිරියේදී සිදුකිරීමට නියමිත ෂෙන්ෂෝ-24 (Shenzhou-24) මෙහෙයුමේ විද්‍යාත්මක උපකරණ භාර විශේෂඥයකු (payload specialist) ලෙස පාකිස්තාන ගගනගාමියකු චීනයේ මිනිසුන් සහිත අභ්‍යවකාශ ගමන් ආයතනය විසින් තෝරාගෙන ඇත. ඒ අනුව චීනයේ අභ්‍යවකාශ මධ්‍යස්ථානය වෙත ගමන් කරන පළමු විදේශිකයා බවට ඔහු පත්වනු ඇත. බෙයිජිංහි තීරය සහ මාර්ග මුලපිරීම (Belt and Road Initiative) යටතේ පවතින ද්විපාර්ශ්වික සහයෝගීතාවේ කොටසක් ලෙස මෙය සිදු වේ. මෙම තොරතුරු සෙනසුරාදා ප්‍රකාශයට පත් කෙරිණි.
ගගනගාමියාගේ නම හෝ දියත් කිරීමේ දිනය චීනය මෙතෙක් ප්‍රකාශයට පත් කර නැත. මෙම වසර අවසන් වන විට මෙහෙයුම සිදුකිරීමට අපේක්ෂා කෙරේ. පාකිස්තාන ගුවන් නියමුවන් වන සීෂාන් අලි (Zeeshan Ali) සහ කුරම් දාවුද් (Khurram Daud) බෙයිජිංහි චීන ගගනගාමී පර්යේෂණ හා පුහුණු මධ්‍යස්ථානයේ (China Astronaut Research and Training Center) මාස කිහිපයක් පුහුණුව ලබා ඇත. පාකිස්තාන ගගනගාමීන් පුහුණු කිරීම සඳහා දෙරට පසුගිය පෙබරවාරි මාසයේදී ගිවිසුමකට අත්සන් තැබීය.
මේ අතර, කිලෝග්‍රෑම් 35ක් බරැති සහ විශේෂිත විද්‍යාත්මක උපකරණ රැගෙන යන පාකිස්තානයේ පළමු චන්ද්‍ර ගවේෂණ රෝවරය වන ජින්නා-1 (Jinnah-1) ද චීනය විසින් සඳ මත ගොඩබස්වනු ඇත.
මෙම වැඩපිළිවෙළ දෙරට අතර අභ්‍යවකාශ සහයෝගීතාවේ සන්ධිස්ථානයක් වන අතර, මිනිසුන් සහිත අභ්‍යවකාශ ගමන් පිළිබඳ අත්දැකීම් ලබාගැනීමට අපේක්ෂා කරන වෙනත් රටවල හවුල්කරුවකු ලෙස චීනයේ වර්ධනය වන භූමිකාව ද පිළිබිඹු කරයි. පාකිස්තානය මෑත වසරවලදී චීන සහාය ඇතිව සිය අභ්‍යවකාශ අභිලාෂයන් පුළුල් කරමින් සිටින අතර, කක්ෂගත මධ්‍යස්ථානයක සෘජු අත්දැකීම් සිය ගගනගාමීන්ට ලබාදීමට මෙම මෙහෙයුම උපකාර වනු ඇතැයි අපේක්ෂා කෙරේ.