ජාත්‍යන්තර මේස පන්දු තරගාවලියේදී තාවි සමරවීරට රන් පදක්කම් දෙකක්

ශ්‍රී ලංකාවේ නැගී එන යොවුන් ක්‍රීඩක තාවි සමරවීර (Taavi Samaraweera), නොවැම්බර් 3 සිට 6 දක්වා මොන්ටෙනීග්‍රෝවේ (Montenegro) පොඩ්ගොරීට්සා (Podgorica) නුවර පැවති WTT යොවුන් අභියෝගතා මොන්ටෙනීග්‍රෝ 2026 (WTT Youth Contender Montenegro) මේස පන්දු තරගාවලියේදී රන් පදක්කම් දෙකක් දිනා ගත්තේය.

වයස අවුරුදු 13න් පහළ සහ 11න් පහළ යන කාණ්ඩ දෙකෙහිම බාලක කේවල ශූරතා දිනාගත් ඔහු, එක් WTT යොවුන් අභියෝගතා තරගාවලියකදී රන් පදක්කම් දෙකක් දිනාගත් පළමු ශ්‍රී ලාංකික මේස පන්දු ක්‍රීඩකයා බවටද පත් විය.

11න් පහළ අවසන් තරගයේදී සිංගප්පූරුවේ (Singapore) ෂැං බොයැං (Zhang Boyang) තරග වට 3-0ක් ලෙස එක දිගට පරාජය කරමින් ඔහු සිය පළමු රන් පදක්කම දිනා ගත්තේය. තමාට වඩා වැඩිමහල් ක්‍රීඩකයන් සමග 13න් පහළ කාණ්ඩයේ තරග කළ ඔහු විශිෂ්ට ක්‍රීඩා රටාවක් පෙන්නුම් කරමින්, අවසන් තරගයේදී මොන්ටෙනීග්‍රෝවේ මිලාන් වුචෙටිච් (Milan Vučetić) 3-1ක් ලෙස පරාජය කර සිය දෙවන රන් පදක්කම තහවුරු කර ගත්තේය.

13න් පහළ ශූරතාව කරා පැමිණි ගමනේදී ඔහු සිංගප්පූරුවේ, කසකස්තානයේ (Kazakhstan) සහ ස්ලෝවැකියාවේ (Slovakia) ක්‍රීඩකයන් පරාජය කළේය. ශ්‍රී ලංකා මේස පන්දු ඉතිහාසයට එක්වූ යොවුන් ක්‍රීඩකයකුගේ මෙම ජාත්‍යන්තර ජයග්‍රහණය මෙරට ක්‍රීඩා ක්ෂේත්‍රයට මහත් සතුටක් ගෙන දී තිබේ.